Conto Geguritan Basa Jawa

Bapak St.Soekiman, panganggit geguritan wayang :)

Mugi saged dados conto-contoh geguritan ugi pasinaon kita sedaya, sumangga..rahayu :)

Geguritan Djaka Lodhang

Sabtu, 25 Agustus 2012

Kanca

Ana kala nelangsa

Ana kala suka cita

Ana kala memala

Ana kanca kang apikan lan loma

Anane gawe ati tansah bungah

Ana kanca kang tumindak ala

Anane misuh gawe ati lara

Kanca kenthel dadi kabegjan

Kanca ala malah kapusan

Ati-ati milih kanca

Geguritan Kedaulatan Rakyat

Minggu, 3 November 2013

Kreteg

Desaku kretege ambrol

kali mili luh

mangsa ketiga wis teles

luntaking swara-swara

Aku ora ngerti geneya ambrol

Pedhoting dalan gawe ora lila

Dalan kang mesthine ngeterake aku lan kanca-kanca

Menyang sekolah weruh gendera negara

Nanging, aku kudu semangat

Nalika mambu baskara lan kringet kang tumetes

Njangkahake sikil mangkat lan bali sekolah

Direwangi ati-ati lan pandongan biyung lan bapak

Sinau sing tenanan lan memitran kanthi jujur

Kareben suk mben bisa gawe kreteg-kreteg kang sentosa

Kanggo nyunggi urip desaku.

8 September 2013

Lemah

Aku mlaku ngluru dalan

Kiwa tengen nyandhang guyon uga tangisan

Lemah reged kebak larahan

Semono uga kringet padha rebutan papan

Aku mlaku ngluru dalan

Bocah-bocah bal-balan

Rebutan sikile nyeker gupak lemah bubar udan

Lemah sing lagi diributke

Karo bapa-biyunge

Layang

: kagem Triman Laksana

Mangsi kang dakgores ana dluwang iki

Ajine ora sepira,

Yen daksawang surya saben lembar lan

Ngeja aksara kang tumata saben guritmu

Embuh, kala nala unjal ambegan, pengen mandheg

Saka rodha jagad aksara

Ngetungi tabuh rampungan dithuthuk, nanging,

Mripat kawicaksanaanmu lair

Murup dadi lilin, ngobong ati

Nalika kelingan kabeh lun lan guyonan

Wis teles bareng lakuning jangkah piwulang

Uga prasasti tembang sandhal jepit

Aku mung saguh ngirim

Layang dedonga

Matur nuwun, Bapak

Ukara

Durung nganti tekane bates wektu

Ukara kang daktata durung metu

Saka ilat, kelu.

Seprene, nganti awak dirogoh goroh

Dalan cerak rumangsa tansaya adoh

Ukara tetep mung dumunung ana gununging aruh.

Mengko, nganti rampung anggone raga gumlethak

Sandhuwure lemah, balung ajur

Tibaning ukara iki kudune menyang sliramu.

Minggu, 14 April 2013

Golek Panguripan

Saben lampu abang murup

Sliramu nembang panguripan

Nggrenjeng gitar kentrung

Nyuwara panjerite laku

Kringet tumetes nelesi raga

Ora perdhuli panas sumelet

Bisa ngranggeh ayang-ayang wektu

Kulit gosong adus panase srengenge

Kabeh dilakoni kanthi kebak rasa

Dina-dina bakal tumeka ana tangan

Kanggo ngluru dalan golek panguripan